ಮನಸಿನ ಕನಸು

ಬಾನಲಿ ಸುಂದರ ಚಂದಿರನೋಟ

ನಿಲ್ಲದ ಕಾಲವ ಸೂಚಿಸಿದೆ

ಮೈಮರೆಸುವ ಈ ನಿನ್ನಯ ನೋಟ

ಚಂದಿರನನ್ನೂ ನಾಚಿಸಿದೆ

ಗುಡುಗಿನ ಜೊತೆಗೆ ಮಿಂಚಿನ ಆಟ

ಭೂಮಿಗೆ ಮಳೆಯನು ಸುರಿಸುತಿದೆ

ಮಿಂಚಿನ ನೋಟದ ನಿನ್ನೊಡನಾಟ

ನನ್ನಲಿ ಪ್ರೀತಿಯ ಹರಿಸುತಿದೆ

ನಡೆಸುವೆ ನಾನು ಬಲು ಹುಡುಕಾಟ

ಮರೆಯಾದರೆ ನೀನೊಂದೊಪ್ಪೊತ್ತು

ಹಗಲಿರುಳೆನ್ನದೆ ನಿನ್ನದೆ ಕಾಟ

ಕಾರಣ ವಯಸ್ಸಿದು ಇಪ್ಪತ್ತು!

ಒಲವಿನ ದಾಹ, ಸ್ನೇಹದ ಕೂಟ

ಸೋತಿತು ಹೇಗೋ ಈ ಮನಸು

ಬಾರದು ನಿದ್ದೆ, ರುಚಿಸದು ಊಟ

ಮನದಲಿ ಬರಿ ನಿನದೇ ಕನಸು