ಗುರುವಾರ, ಏಪ್ರಿಲ್ 11, 2019

ಭಾವರಂದ್ರ



ನಕ್ಷತ್ರಗಳು ಮಿನುಗುತ್ತಿವೆ
ತನ್ನ ಸುತ್ತ ಜೀವ ತುಂಬಿಸಿ

ಹಲವು ಭೂಮಿಗಳು ನಲಿದಿವೆ
ನೂರು ನೆನಪುಗಳ ಕೂಡಿಸಿ

ತಾರೆಗಳಿಗೂ ಮುಪ್ಪಾವರಿಸಿದೆ
ನಲಿವುಗಳು ನೆನಪುಗಳಾಗಿವೆ

ಸಣ್ಣ ತಾರೆಗದು ಸಿಡಿಯುವ ಚಕ್ರ
ದೊಡ್ಡ ನಕ್ಷತ್ರವಿನ್ನು ಕಪ್ಪು ರಂದ್ರ

ಕಪ್ಪುರಂದ್ರವದು ಬಹು ಸಾಂದ್ರ
ಭಾವನೆಗಳೂ ಹೊರನುಸುಳವಿನ್ನು

ಕಪ್ಪು ಗೋರಿಗಳು ಜಗಕೆ ನಿರ್ಜೀವ
ಆದರದಕೆ ತನ್ನೊಳಗೊಂದು ವಿಶ್ವ

ಇಲ್ಲಿ ಕಾಣುವುದೆಲ್ಲವೂ ಸಾಪೇಕ್ಷ
ಆದರೆ ಇರುವುದೆಲ್ಲವೂ ನಿರಪೇಕ್ಷ

ಕಪ್ಪುಗೋರಿಗಳೂ ಇಲ್ಲಿ ಸಾಯುತ್ತಿವೆ
ಭಾವಗಳು ವಿಕಿರಣವಾಗಿ ನಶಿಸುತ್ತಿವೆ

3 ಕಾಮೆಂಟ್‌ಗಳು:

ಜಲನಯನ ಹೇಳಿದರು...

ಭಾವರಂದ್ರದ ಭಾವವಂತೂ ಸುಂದರ...ಭಾವನೆಗಳೂ ಹೊರನುಸುಳವಿನ್ನು... (ಬಹುವಚನಕ್ಕೆ ತಕ್ಕ ಕ್ರಿಯಾ ಬಹುವಚನ..ಬರಬೇಕೇನೋ...ನನ್ನ ಅನುಮಾನ).. ಭೌತಶಾಸ್ತ್ರದ ಉತ್ತಮ ಕವಿತಾ ವಿವರಣೆ... ಬ್ಲಾಕ್‌ ಹೋಲ್‌, ಮಿಲ್ಕಿವೇ, ಎಲ್ಲಾ...

sunaath ಹೇಳಿದರು...

ಎರಡು ವರುಷಗಳ ನಂತರ ಬಾಳದೋಣಿಯಲ್ಲಿ ಮತ್ತೆ ಪಯಣಿಸುತ್ತಿದ್ದೇನೆ. ಧನ್ಯವಾದಗಳು. ಪುನರಾಗಮನಕ್ಕಾಗಿ ಬೃಹತ್ ವಿಶ್ವವನ್ನೇ ಆಯ್ದುಕೊಂಡಿದ್ದೀರಿ. ಸುಂದರವಾದ ಭಾವನೆ. ಆದರೆ, ಜಲನಯನರ ಅನುಮಾನಕ್ಕೆ ನಾನೂ ಸಹಮತನಿದ್ದೇನೆ. (ಅವರದು ಎಷ್ಟೆಂದರೂ ವಿಜ್ಞಾನಿಯ ಸೂಕ್ಷ್ಮ ಕಣ್ಣು!)

ತೇಜಸ್ ಜೈನ್ Tejas jain ಹೇಳಿದರು...

ಜಲನಯನ, ಸುನಾಥರಿಗೆ ಧನ್ಯವಾದಗಳು... ತಪ್ಪನ್ನು ಸರಿಪಡಿಸಿದ್ದೇನೆ....

ತಮಾಷೆಗಾಗಿ:
ಭಾವರಂದ್ರದ ಸ್ನೇಹಪರಿದಿಯೊಳಗೆ (event horizon) ಭಾವನೆಗಳು ತನ್ನ ಗುರುತನ್ನು ಕಳಚಿ ಏಕೀಕರಣಗೊಂಡಿದ್ದರಿಂದ(singularity) ಬಹುವಚನದಿಂದ ಮುಕ್ತವಾಗಿದದೆಯೆಂದು ವಾದಿಸಬಹುದು...