ನಾ ಕೂಡ ನಲಿವೆ

ನಮ್ಮೂರ ಜಾತ್ರೆಲ್ಲಿ ಕಪ್ಪಡರೋ ಹೊತ್ತಲ್ಲಿ

ನನಗಾಗಿ ಕಾದಿದ್ದು ನಿಜವೆ?

ಹೌದೆನ್ನು ಚೆಲುವೆ, ನಾ ಕೂಡ ನಲಿವೆ

ರಥಬೀದಿ ಬದಿಯಲ್ಲಿ ಗೆಳತಿಯರ ಸಂದಲ್ಲಿ

ಕುಡಿನೋಟ ಬೀರಿದ್ದು ದಿಟವೆ?

ಹೌದೆನ್ನು ಚೆಲುವೆ, ನಾ ಕೂಡ ನಲಿವೆ

ಮುಸ್ಸಂಜೆ ಮಬ್ಬಲ್ಲಿ ನಿನ್ನ ತುಟಿಯಂಚಲ್ಲಿ

ನನಗಲ್ಲಿ ಕಂಡಿದ್ದು ನಗುವೆ?

ಹೌದೆನ್ನು ಚೆಲುವೆ, ನಾ ಕೂಡ ನಲಿವೆ

ಮರೆಯಾಗೋ ಮೊದಲಲ್ಲಿ ನಿನ್ನ ಕಣ್ಣಂಚಲ್ಲಿ

ಮಿಂಚಾಗಿ ಮೂಡಿದ್ದು ಒಲವೆ?

ಹೌದೆನ್ನು ಚೆಲುವೆ, ನಾ ಕೂಡ ನಲಿವೆ

ದೂರ

ಬಗೆಬಗೆಯ ಕನಸು ಮೂಡಿಹ,

ಏಳು ಬಣ್ಣಗಳ ಬದುಕಿನಲಿ,

ಬರಿದಾದ ಮನಸು ಏತಕೆ?

ನೀನಿರಲು ನನ್ನ ಹೃದಯದೊಳು,

ಈ ವಿರಹವೇತಕೆ?

ಮಾತು ಮೌನವಾಗಿಹ,

ಸುಂದರ ಸಮಯದೊಳು ಈ ದೂರವೇತಕೆ?

ಬಯಕೆ

ಕನವರಿಕೆಯ ಮಾತು ನಿನ್ನ ಮನದ ಮೂಲದಿ ತೆರೆಯಲಿ,

ಹಗಲುಗನಸಲಿನ್ನು ಎನ್ನ ನೆರಳು ನಿನಗೆ ತೋರಲಿ,

ಸಿಹಿನಗುವು ಮೂಡಲಿ ಇನ್ನು ನೀ..

ನನ್ನ ಸನಿಹ ಬಯಸಲಿ.

ಪ್ರತಿಬಿಂಬ

ಹೃದಯವೆಂಬ ಕನ್ನಡಿಯಲಿ

ಬಿಂಬಿಸಿದ ನಿನ್ನ ಛಾಯೆಯ

ನಗುವಿನಲಿ ಮರೆಯಲೆತ್ನಿಸಿದೆ

ಆದರೆ ಕಣ್ಣೀರಿನಲಿ ನೀ ಮೂಡಿದ್ದೆ

ನಿದ್ರೆಯಲಿ ಮುಚ್ಚಲೆತ್ನಿಸಿದೆ

ಕನಸಿನಲ್ಲೂ ನೀ ಬಂದು ಕುಳಿತಿದ್ದೆ

ವಿದ್ಯಾರ್ಜನೆಯ ಬೆಳಕ ಹಚ್ಚಿದೆ

ಆ ದೀಪದಡಿಯಲ್ಲಿ ನೀ ನಕ್ಕಿದ್ದೆ

ಕೊನೆಗೆ ಬಳಲಿ ಕನ್ನಡಿಯ ಒಡೆದಾಗ

ನೂರು ಚೂರಿನಲ್ಲೂ ನೀ ಕಾಡುತ್ತಿರುವೆ

ಮೌನಾಗ್ನಿ

ಮಲ್ಲಿಗೆಯು ಸುವಾಸನೆ ಬೀರಲಿಲ್ಲ

ನಿನ್ನ ನೀಳ ಕೇಶ ರಾಶಿಯಂತೆ

ನಕ್ಷತ್ರಗಳು ಹೊಳೆಯಲಿಲ್ಲ

ನಿನ್ನ ಕಮಲದ ಕಂಗಳಂತೆ

ಮೊಗ್ಗುಗಳು ಅರಳಲಿಲ್ಲ

ನಿನ್ನ ಹವಳದ ತುಟಿಗಳಂತೆ

ಅಮೃತಶಿಲೆಯು ನುಣುಪಾಗಿ ತೋರಲಿಲ್ಲ

ನಿನ್ನ ಸುಕೋಮಲ ಕೆನ್ನೆಯಂತೆ

ನವಿಲುಗಳು ನಾಟ್ಯ ಮಾಡಲಿಲ್ಲ

ನಿನ್ನ ವೈಯಾರದ ನಡಿಗೆಯಂತೆ

ಹಕ್ಕಿಯ ಕಲರವ ಇಂಪಾಗಿ ಕೇಳಲಿಲ್ಲ

ನಿನ್ನ ಕಾಲ್ಗೆಜ್ಜೆಯ ಸದ್ದಿನಂತೆ

ಹರಿವ ನೀರು ಜುಳು ಜುಳು ನಾದ ಹೊರಡಿಸಲಿಲ್ಲ

ನೀನು ಗುನುಗುನಿಸುವ ಮಧುರ ಮಾತಿನಂತೆ

ಜೇನು ಕೂಡ ಸಿಹಿ ನೀಡಲಿಲ್ಲ

ನಿನ್ನ ಅಧರ ಸ್ಫುರಿಸಿ ನೀಡಿದಂತೆ

ಸೂರ್ಯನ ಕಿರಣವು ಕಾವೇರಿಸಲಿಲ್ಲ

ನಿನ್ನ ಬಿಗಿದಪ್ಪುಗೆಯು ಕಾವೇರಿಸಿದಂತೆ

ಹಾಗೆಯೇ ಬೆಂಕಿ ಕೂಡ ಸುಟ್ಟಿರಲಿಲ್ಲ

ಈ ನಿನ್ನ ಮೌನ ನನ್ನ ಸುಡುತ್ತಿರುವಂತೆ