ಮಂಗಳವಾರ, ಫೆಬ್ರವರಿ 16, 2010

ಮೌನಾಗ್ನಿ

ಮಲ್ಲಿಗೆಯು ಸುವಾಸನೆ ಬೀರಲಿಲ್ಲ
ನಿನ್ನ ನೀಳ ಕೇಶ ರಾಶಿಯಂತೆ
ನಕ್ಷತ್ರಗಳು ಹೊಳೆಯಲಿಲ್ಲ
ನಿನ್ನ ಕಮಲದ ಕಂಗಳಂತೆ
ಮೊಗ್ಗುಗಳು ಅರಳಲಿಲ್ಲ
ನಿನ್ನ ಹವಳದ ತುಟಿಗಳಂತೆ

ಅಮೃತಶಿಲೆಯು ನುಣುಪಾಗಿ ತೋರಲಿಲ್ಲ
ನಿನ್ನ ಸುಕೋಮಲ ಕೆನ್ನೆಯಂತೆ
ನವಿಲುಗಳು ನಾಟ್ಯ ಮಾಡಲಿಲ್ಲ
ನಿನ್ನ ವೈಯಾರದ ನಡಿಗೆಯಂತೆ
ಹಕ್ಕಿಯ ಕಲರವ ಇಂಪಾಗಿ ಕೇಳಲಿಲ್ಲ
ನಿನ್ನ ಕಾಲ್ಗೆಜ್ಜೆಯ ಸದ್ದಿನಂತೆ

ಹರಿವ ನೀರು ಜುಳು ಜುಳು ನಾದ ಹೊರಡಿಸಲಿಲ್ಲ
ನೀನು ಗುನುಗುನಿಸುವ ಮಧುರ ಮಾತಿನಂತೆ
ಜೇನು ಕೂಡ ಸಿಹಿ ನೀಡಲಿಲ್ಲ
ನಿನ್ನ ಅಧರ ಸ್ಫುರಿಸಿ ನೀಡಿದಂತೆ
ಸೂರ್ಯನ ಕಿರಣವು ಕಾವೇರಿಸಲಿಲ್ಲ
ನಿನ್ನ ಬಿಗಿದಪ್ಪುಗೆಯು ಕಾವೇರಿಸಿದಂತೆ

ಹಾಗೆಯೇ ಬೆಂಕಿ ಕೂಡ ಸುಟ್ಟಿರಲಿಲ್ಲ
ಈ ನಿನ್ನ ಮೌನ ನನ್ನ ಸುಡುತ್ತಿರುವಂತೆ

8 ಕಾಮೆಂಟ್‌ಗಳು:

ಸಿಮೆಂಟು ಮರಳಿನ ಮಧ್ಯೆ ಹೇಳಿದರು...

ಹರೀಷ್...

ಮೌನ ಸಂಗೀತ..
ಮೌನ ಮಾತು
ಮೌನ ಮದಿರಾ..
ಮೌನ ಮಧುರ..
ಮೌನ ಮುತ್ತು..
ಮತ್ತು.. ಮತ್ತು..

ಎಂದೆಲ್ಲ ಗೊತ್ತಿತ್ತು...

ಇಲ್ಲಿ ಮೌನ ಸುಡುವ ಅಗ್ನಿ !!

ಚಂದದ ಕವನ...
ಪ್ರತಿ ಸಾಲುಗಳೂ ಚೆನ್ನಾಗಿವೆ..

ಅಭಿನಂದನೆಗಳು...

Basavaraj ಹೇಳಿದರು...

ಮಾತು ಬೆಳ್ಳಿಯಾದರೆ ಮೌನ ಅನ್ನೊದು ಬಂಗಾರ ಆದರೆ ನಿಮ್ಮ ಕವನ ಓದಿದ ಮೇಲೆ ಅದು ಸುಡುವ ಕೆಂಡ ಅಂತ ಗೊತ್ತಾಯ್ತು ತುಂಬಾ ಚೆನ್ನಾಗಿದೆ ನಿಮ್ಮ ಕವನದ ಸಾಲುಗಳು

ಜಲನಯನ ಹೇಳಿದರು...

ಕವನ, ಎಲ್ಲ ಭಾವನೆಗಳಿಗೆ ಕನ್ನಡಿಯಂತೆ ಬಿಂಬಿಸಿದ್ದೀರಿ..ಸಾಲುಗಳು ಪದಗಳ ಭಾಷೆ ಮಾತನಾಡಿದರೆ ಪದಗಳು ಭಾವನದ ಭಾಷೆಗೆ ಓಗೊಟ್ಟಿದೆ...ಮುನ್ನಡೆಯಲಿ...

sunaath ಹೇಳಿದರು...

ಕವನವೆಂದರೆ ಹೀಗಿರಬೇಕು!

Harish - ಹರೀಶ ಹೇಳಿದರು...

ಸೋಮ .. ಕವನ ಸೂಪರಾಗಿದೆ :-) ಸುನಾಥ ಕಾಕಾ 'ಕವನವೆಂದರೆ ಹೀಗಿರಬೇಕು' ಎಂದಿದ್ದಾರೆ ಅಂದ್ಮೇಲೆ ಬೇರೆ ಸರ್ಟಿಫಿಕೇಟ್ ಬೇಕಾ!?

ಪ್ರಕಾಶಣ್ಣ, ಇದನ್ನು ಬರೆದಿದ್ದು ಸೋಮ, ನಾನಲ್ಲ :-)

ಸೋಮಶೇಖರ ಹುಲ್ಮನಿ ಹೇಳಿದರು...

ಪ್ರಕಾಶ್ ,ಬಸವರಾಜ್ ,ಸುನಾಥ್,ಜಲಾನಯನ ಮತ್ತು ಹರೀಶ್ ಗೆ ನನ್ನ ತುಂಬು ಹೃದಯದ ಧನ್ಯವಾದಗಳು.
ನಿಮ್ಮೆಲ್ಲರ ಪ್ರೋತ್ಸಾಹ ನನಗೆ ಅಂಬೆ ಗಾಲಿನ ಮಗು ನಡೆಯುವದನ್ನು ಕಲಿತಾಗ ಮನೆಯವರು ತೋರಿಸುವ ಕಾಳಜಿಯಂತೆ ತೋರುತ್ತಿದೆ .ಇದು ಹೀಗೆ ಮುಂದು ವರಿಯಲಿ.....

ಗೌತಮ್ ಹೆಗಡೆ ಹೇಳಿದರು...

good.ishtavaaytu:)

Prakash ಹೇಳಿದರು...

ತುಂಬ ಚೆನ್ನಾಗಿದೆ